जिल्हा परिषद निवडणुकांच्या पार्श्वभूमीवर मुख्यमंत्र्यांची पेणमध्ये जाहीर सभा !
रायगड–पेण ग्रोथ सेंटर हा मुद्दा प्रचाराच्या अग्रस्थानी; स्थानिकांच्या रोजगाराबाबत साशंकता.
प्रतिनिधी, पेण
मिनी मंत्रालय म्हणून ओळखल्या जाणाऱ्या राज्यातील 12 जिल्हा परिषदा आणि 125 पंचायत समित्यांच्या निवडणुकीसाठी 5 फेब्रुवारी 2026 रोजी मतदान आणि 7 फेब्रुवारी 2026 रोजी मतमोजणी होऊन निकाल घोषित केला जाईल. निवडणुकीसाठी आता काही दिवस बाकी असल्याने पुन्हा एकदा राजकीय वातावरण तापायला लागले आहे. महत्त्वाचे म्हणजे महापालिका निवडणुकीतील यशानंतर जिल्हा परिषद निवडणुकीतही भाजपचे वर्चस्व निर्माण करण्यासाठी मुख्यमंत्री देवेंद्र फडणवीस यांनी कंबर कसली असून राज्याचा झंझावती दौरा करणार आहेत.
आज २८ जानेवारी रोजी सकाळी ११.०० वाजता पेण नगर परिषदेच्या भव्य पटांगणात मुख्यमंत्र्यांची जाहीर सभा होणार आहे. मात्र या सभेचे आमंत्रण पेन मधील पत्रकारांना अद्याप दिले नसल्याने या सभेबाबत कमालीची गुप्तता पेण तालुका भाजप कमिटी कडून पाळण्यात आलेली आहे.
दावोस येथील वर्ल्ड इकॉनॉमिक फोरमच्या वार्षिक परिषदेत महाराष्ट्राने शहरी आणि औद्योगिक विकासाच्या दिशेने मोठे पाऊल टाकले असून तिसऱ्या मुंबईतील पहिले शहर म्हणून रायगड–पेण ग्रोथ सेंटरची अधिकृत घोषणा करण्यात आली आहे. हाच मुद्दा होऊ घातलेल्या पंचायत समित्या आणि जिल्हा परिषद निवडणुकांच्या पार्श्वभूमीवर हाच मुद्दा मुख्यमंत्र्यांच्या रायगड जिल्ह्यामधील प्रत्येक सभेतही अग्रस्थानी असेल. मात्र या ग्रोथ सेंटर मधून रायगड करांच्या हाती काही लागेल का ? हा प्रश्न रायगड तसेच पेण मधील तरुण या सभेमध्ये मुख्यमंत्र्यांना विचारणार आहेत.
