पेणमध्ये भाजप – राष्टवादी युती बाबत उमेदवारांसह कार्यकर्त्यांमध्ये संभ्रम ?

राष्ट्रवादी काँग्रेस पक्षाच्या शहर अध्यक्षांची उमेदवारीसाठी कसरत.

पेण नगरपालिका निवडणुकीमध्ये महायुतीवर प्रश्नचिन्ह ?

अरविंद गुरव, पेण

स्थानिक स्वराज्य संस्थांच्या निवडणुकांचे बिगुल वाजले असून मागील तीन वर्षापासून प्रलंबित असलेल्या पेण नगरपरिषद निवडणुकीत आपल्याच पक्षाची सत्ता काबीज करण्यासाठी राजकीय घडामोडींना वेग आला आहे.

गेल्या पंचवार्षिक निवडणुकीत पेण नगरपरिषदेवर एक हाती सत्ता उपभोगलेल्या भाजपच्या नगरपरिषदेच्या सत्तेमध्ये आता राष्ट्रवादी काँग्रेस (अजित पवार गट) च्या रूपाने नवा वाटेकरी येणार असल्याने ही बाब भाजपचे उमेदवार तसेच कार्यकर्ते यांना काहीशी पचलेली दिसत नसल्याने पेणमध्ये राष्ट्रवादी काँग्रेस आणि भाजप या दोन पक्षांच्या युतीचा संभ्रम निर्माण झाल्याचे चित्र आहे. यामुळे दोन्ही पक्षातील कार्यकर्ते मात्र गोंधळलेल्या स्थितीत आहेत. तसेच पेण शहरामध्ये शिवसेना शिंदे गटाचे प्राबल्य नसल्यामुळे शिंदे गट एकाकी पडला आहे. 

एकीकडे दोन्ही पक्षांचे स्थानिक कार्यकर्ते व पदाधिकारी युती नको, असे अंतर्गत सांगत असताना दोन्ही पक्षांतील वरिष्ठ पातळीवरील नेते मात्र युती ठेवण्याबाबत अजूनही अनुकूल असलेले दिसतात. त्यातच पेण नगरपरिषदेचे माजी नगराध्यक्ष शिशीर धारकर यांच्या आम्ही पेणकर विकास आघाडी या पॅनलने पहिल्या १० उमेदवारांची यादी प्रसिद्ध केल्याने शिशीर धारकर आणि त्यांचे सहकारी या नगरपरिषदेच्या निवडणुकीमध्ये मोठ्या ताकतीने “कमबॅक” करणार असल्याचे पेणमधील राजकीय जानकारांकडून सांगण्यात येत आहे. त्यातच राष्ट्रवादी काँग्रेस पक्षातील काही उमेदवार आणि कार्यकर्ते शिशिर धारकर यांच्या आम्ही पेण कर विकास आघाडीच्या संपर्कात आसल्याचे सूत्रांनी सांगितले.

महायुतीचा धर्म पाळत मागील लोकसभा आणि विधानसभा निवडणुकांत भाजप आणि राष्ट्रवादी (अजित पवार गट) एकत्र होते, मात्र यावेळी स्थानिक निवडणुकीत या युतीत दुरावा निर्माण झाल्याचे बोलले जात आहे. घटक पक्षात अंतर्गत नाराजी आणि कटकारस्थान सुरू असल्याची चर्चा पेण शहरात रंगली आहे.

पेण नगरपरिषद निवडणुकीत अध्यक्षपदासाठी सर्वसाधारण महिला आरक्षण लागल्याने महायुतीकडून भाजपच्या प्रीतम ललित पाटील यांचे नाव समोर आले होते. मात्र राष्ट्रवादी काँग्रेस (अजित पवार गट) पक्षाकडून वसुधा तुकाराम पाटील यांनी नगराध्यक्ष पदासाठी वरिष्ठांकडे अर्ज दाखल केला आहे, यामुळे महायुतीत संभ्रम निर्माण झाला आहे. तर दुसरीकडे राष्ट्रवादी काँग्रेस पक्षाच्या शहर अध्यक्षांची उमेदवारीसाठी मोठी कसरत सुरू असल्याचे दिसत आहे.

दरम्यान, राष्ट्रवादी काँग्रेस पक्षाकडे नगरसेवक पदांसाठी तब्बल २२ अर्ज प्राप्त झाले आहेत. प्रभाग १ ते १० मधील अनेक इच्छुकांनी अर्ज दाखल करत सर्व जागांवर उमेदवार लढण्याची तयारी दर्शविली आहे. या अर्जांमध्ये राष्ट्रवादी काँग्रेस पक्षातर्फे प्रभाग निहाय खालील उमेदवारी अर्ज प्राप्त झाले आहेत.

• प्रभाग क्र.१ – अर्पिता कुंभार व निकित पाटील.
• प्रभाग २ – भूषण मनोरे, कोमल मनोरे.
• प्रभाग ३ – संजय परशुराम म्हात्रे व रजनी वारकर.
• प्रभाग ५ – दीपक गुरव, पुष्कराज गुरव व भूषण पांडुरंग कडू.
• प्रभाग ६ – आनंद जाधव व स्वाती म्हामणकर.
• प्रभाग ७ – वाहिद खोत, वैभव आवास्कर व मुस्कान रफिक झटाम.
• प्रभाग ९ – निवृत्ती पाटील.
• प्रभाग १० – मीनाक्षी पाटील

या उमेदवारांनी पेण राष्ट्रवादी काँग्रेस पक्ष जनसंपर्क कार्यालयात फॉर्म दाखल करून वरिष्ठानकडे उमेदवारीची मागणी केली आहे. यातूनच राष्ट्रवादी पक्ष जागा वाटपावरून नाराज असून निवडणुकीत सर्व जागांवर लढण्याची तयारी असल्याचे चित्र दिसत आहे. या घडामोडींमुळे महायुतीतील भाजप आणि राष्ट्रवादी हे दोन्ही पक्ष पेण नगरपरिषद निवडणुकीत एकत्र लढणार की स्वतंत्रपणे, याबाबत आता राजकीय वर्तुळात उत्सुकता निर्माण झाली आहे.