उमेदवारांचे भवितव्य ईव्हीएम यंत्रात बंद !

पेण विधानसभा मतदार संघात अंदाजे ६१.८० टक्के मतदान.

प्रतिनिधि, पेण

पेण-सुधागड-रोहा मतदारसंघात बुधवारी सकाळपासून मतदानास प्रारंभ झाला, याकरिता प्रशासन सज्ज झालेले दिसत होते. मतदान केंद्रावर कर्मचारी दाखल झाले होते. १९१ – पेण विधानसभा मतदारसंघातील उमेदवारांचे भवितव्य ईव्हीएम यंत्रात बंद झाले आहे. मतदार संघात शांतेत मतदान पार पडले असून. पेण येथील फणस डोंगरी येथील मतदान केंद्रावरील किरकोळ वाद वगळता इतर ठिकाणी शांततेत मतदान पार पडले.

पेण विधानसभा मतदारसंघात एकूण ३८० मतदान केंद्र आहेत, याकरिता जवळपास १८०० कर्मचारी नियुक्त करण्यात आले होते. या कर्मचाऱ्यांना मंगळवारी त्यांच्या मतदान केंद्रांवर सोडण्यात आले. पेण मतदारसंघाचे प्रांत अधिकारी प्रविण पवार यांनी तयारी केली होती. पहाटेपासून येथे मतदान प्रक्रियेला सुरुवात झाली. दुपारी १.०० वाजेपर्यंत मतदारांचा अल्पप्रतिसाद दिसत होता. परंतु दोन नंतर मतदार केंद्रावर मतदारांच्या रांगा दिसत होत्या. या मतदार संघात एकूण ३१३५८७ मतदात आहेत. यात १५३३१७ महिला मतदार तर १५४६६१ पुरुष मतदार आहेत. अपंग मतदारांची संख्या १२१६ होती तर जेष्ठ मतदार संख्या ४३९२ होती. १ तृतीय पंथी मतदार आहे. मागील निवडणुकी पेक्षा यावर्षी ६८०० नव मतदारांनी आपला मतदानाचा हक्क बजावला. सायंकाळी ५.३० पर्यंत ६१.८० टक्के मतदान झाले. मात्र मतदानाची अंतिम आकडेवारी (टक्केवारी) प्रशासनाकडन रात्रि ८:३० वाजेपर्यंतही प्राप्त झाली नाही.

मतदानाच्या पूर्वसंध्येला शेतकरी कामगार पक्षाच्या लेटरहेडवर असलेल एक पत्र वायरल झाले होते. या वायरल झालेल्या पत्राचा फायदा कोणत्या पक्षाच्या उमेदवाराला होणार हे येत्या २३ तारखेलाच स्पष्ट होईल.

मतदान केंद्रांवर पिण्याच्या पाण्याची सुविधा, वीज व्यवस्था, दिव्यांगांना दिल्या जाणाऱ्या सुविधा आदीबाबत मतदान केंद्र अधिकारी आणि कर्मचाऱ्यांनी तयारी केली होती. पेण मतदारसंघात मुख्यत्वे ३ उमेदवारांमध्ये चुरशिचि लढत होत आहे. यात भाजप, शिवसेना (उबाठा) आणि शेकाप या पक्षांमध्ये ही लढत होत आहे. महाविकास आघाडीमध्ये झालेल्या बिघाडीमुळे मतदारांमध्ये मोठ्या प्रमाणात संभ्रम पहायला मिळत होता.१९१ पेण-सुधागड-रोहा विधानसभा मतदार संघाच्या निवडणुकीच्या आखाड्यात ७ उमेदवारांमध्ये लढत होत आहे. या मतदारसंघात तिरंगी लढत होणार असल्याने सर्वांचेच लक्ष या लढतीकडे लागले आहे. या तिनही उमेदवारांनी गेला महिनाभर प्रचारासाठी मेहनत घेतली आहे. त्यांची मेहनत आणि भवितव्य बुधवारी मतदानाच्या रूपाने ईव्हीएम यंत्रात बंद झाली.