शिवसेना आयोजित घरगुती सजावट स्पर्धेचा निकाल जाहीर !

निगडेच्या विनीत तांडेल याने पटकाविला प्रथम क्रमांक

प्रतिनिधि, पेण

शिवसेना पेण विधानसभा सह समन्वयक समीर म्हात्रे आणि शिवसेना उद्धव बाळासाहेब ठाकरे पेण तालुका आयोजित “घरगुती गणेशोत्सव सजावट स्पर्धा ”बक्षीस वितरण समारंभ गणेशोत्सव काळात पार पाडण्यात आला होता. या स्पर्धेचा निकाल आज शिवसेनेच्या वतीने जाहीर करण्यात आला. सदर बक्षीस समारंभा प्रसंगी शिवसेना नरेश गावंड, आयोजक आणि शिवसेना पेण विधानसभा समन्वयक समीर म्हात्रे, महीला जिल्हा संघटीका दीपश्री पोटफोडे, जिल्हा समन्वयक नरेश गावंड, शहर प्रमुख सुहास पाटील, सम्पर्क प्रमुख राजाराम पाटील, जिल्हा संघटीका दर्शना जवके, विधानसभा संघटीका महानंदा तांडेल,योगेश पाटील, चेतन मोकल आदी उपस्थित होते.

एकत्र कुटुंब घरगुती गणेशोत्सव ही संस्कृती कुठेतरी लोप पावत चालली आहे आणि त्या संस्कृतीला समाजासमोर आणण्यासाठी तसेच गणेशोत्सव काळात अनेक ठिकाणी विविध समस्यांच्या माध्यमातून तयार करण्यात येणाऱ्या देखाव्यांची जनजागृती करण्यासाठी उध्दव बाळासाहेब ठाकरे यांच्या शिवसेनेच्या वतीने आणि पेण विधानसभा समन्वयक समीर म्हात्रे यांच्या पुढाकाराने ही स्पर्धा आयोजित करण्यात आली होती. या स्पर्धेला नामांकित चित्रकार जितेंद्र गायकवाड यांची स्पर्धक म्हणून निवड करण्यात आली होती. गणेशोत्सव स्पर्धेत देखाव्यातून देण्यात आलेले संदेश, केलेली सजावट, आरास व्यवस्था आणि करण्यात आलेले सादरीकरण या निकषानुसार पेण निगडे – आमटेम येथील विनीत पाटील याने प्रथम क्रमांक, तर धाकटे वढाव येथील डॉ नंदकुमार म्हात्रे द्वितीय क्रमांक आणि पेण कुंभार आळी येथील राहुल जितेकर यांनी तृतीय क्रमांक पटकाविला. यावेळी पेण डावरे येथील श्रीशा घरत आणि वडखळ येथील भूषण पाटील यांना प्रोत्साहनपर सजावट केल्याबद्दल गौरविण्यात आले. सदर गुणवंत स्पर्धकांना छत्रपती शिवाजी महाराजांची प्रतिमा आणि प्रशस्तिपत्रक देऊन गौरविण्यात आले तर विजेत्यांना छत्रपती शिवाजी महाराजांची प्रतिमा,प्रशस्तिपत्रक आणि रोख रक्कम देऊन गौरविण्यात आले आहे.

कुटुंब एकत्र येऊन गणेशोत्सव साजरा करण्याची लोप पावत चाललेली संस्कृती पुन्हा एकदा नव्याने सुरु व्हावी आणि ज्या गणेशभक्तांनी पोटतिडकीने आपल्या बाप्पाची सजावट केली आहे त्यांनी त्यातून दिलेला सामजिक संदेश समाजापर्यंत जाऊन त्याची जनजागृती व्हावी या उद्देशाने आम्ही ही स्पर्धा आयोजित केली होती. त्याला चांगला प्रतिसाद लाभला आहे, पुढच्या वर्षी देखील याही पेक्षा मोठ्या स्वरूपात ही स्पर्धा आयोजित केली जाईल. – समीर म्हात्रे,सह समन्वयक (शिवसेना पेण विधानसभा)